နန်းတွင်းဆေးတိုက်မိသားစုမှ ငွေငါးသိန်းကျပ်နှင့်အတူ ၀က်အူတောင်း ထုပ်များ၊ လဘက်၊ ပဲကြော်ထုပ်များ လှူဒါန်းသည်။ နန်းတွင်းဆေးတိုက် မိသားစုသည် ၀က်လက် လှတောရွာ ဇာတိ၊ မင်းတုန်းမင်း၊ သီပေါမင်း လက်ထက် နာမည်ကျော် စစ်သူကြီး ဗိုလ်ရွှေဗြင်၏ အဆက်အနွယ်များဖြစ်ကြသည်။ နန်းတွင်းဆေးတိုက်ပိုင်ရှင် ဒေါ်ထွေးသည် ဗိုလ်ရွှေဗြင်၏သား စစ်ကဲကြီး ဦးထွန်း၊ ဦးထွန်း၏ မြေး ဒေါ်ဖွားညွန့်၏ သမီးဖြစ်သည်။ ဒေါ်ထွေး၏ ခင်ပွန်း ဦးထိန်ဝင်းသည် ၀က်လက် ရေထွက်ရွာ ဇာတိဖြစ်သည်။ ကျောင်းဆရာဟောင်း စကားနည်း လူအေး တစ်ယောက်ဖြစ်သည်။အဝေးပြေးဂိတ်သို့ ဒေါ်ထွေးတို့ ဇနီးမောင်နှံနှစ်ဦး လိုက်ပို့ကြသည်။ ကားပေါ်သို့ ပစ္စည်းများတင်ပေးပြီးကာမှ နှုတ်ဆက်ကာ ပြန်လည် ထွက်ခွာသွားကြသည်။ ည ၈ -နာရီထိုးလျှင် စာရေးသူတို့ကားလည်း မန္တလေး အဝေးပြေးဂိတ်မှ စတင်ထွက်ခွာခဲ့သည်။
၁၁-၁၁-၁၁။
နံနက် ၆ နာရီထိုးလျှင် စာရေးသူတို့ကားသည် ရန်ကုန် အောင်မင်္ဂလာ အဝေးပြေး ကားဂိတ်သို့ ဆိုက်ရောက်သည်။ အဝေးပြေးဂိတ်တွင် လာရောက်ကြို မည့် ကိုဇော်သောင်းကို မတွေ့ရသဖြင့် ဖုန်းဖြင့် လှမ်းမေးရသည်။ ၇ နာရီလောက်တွင် ကိုဇော်သောင်း ရောက်လာပြီး မြောက်ဒဂုံရှိ သီတဂူစင်တာသို့ သွားကြသည်။ သီတဂူ စင်တာသို့ ရောက်သောအခါ စာရေးသူအား တွေ့ရန် စောင့်မျှော်နေသော မမေစီအောင်တို့ကို တွေ့ရသည်။ မမေစီအောင်သည် ပခုက္ကူဇာတိဖြစ်ပြီး ဥက္ကံမြို့ သကြားစက်ရုံတွင် တာဝန်ထမ်းဆောင်နေသူဖြစ်သည်။ ယခုအခါ စာရေးသူ အိန္ဒိယသို့ ပြန်မည်ကို သိသဖြင့် လက်ဆောင်ပစ္စည်း (ငါးရံခြောက်၊ ပုဇွန်ခြောက်၊ ကော်ဖီ ထုပ်များစွာဖြင့်) သူမ၏ သူငယ်ချင်းမိသားစုနှင့်အတူ ရန်ကုန်က စောင့်ကြို နေခြင်း ဖြစ်သည်။ စာရေးသူ ပခုက္ကူ ရောက်စဉ်ကလည်း မမေစီအောင်၏ မိဘဆွေမျိုးများက အလှူငွေ။ လက်ဆောင်ပစ္စည်းများ ပေးလိုက်ကြသေးသည်။ နံနက်ပိုင်းတွင် ပစ္စည်းများကို ထုပ်ပိုးပြင်ဆင်သည်။ ဒေါ်လာငွေ လဲလှယ်ရန်အတွက် ဒေါ်မွှေးချိုအား ခေါ်သည်။ တစ်ဒေါ်လာ ၈၂ ခွဲနှုန်းဖြင့် ဒေါ်လာ (၈) ထောင်ကျပ်ကို မြန်မာငွေ ကျပ်သိန်း (၆၀)နှင့် လဲလှယ်သည်။ နေ့လည်စာ စားပြီး မြို့ထဲသို့ ထွက်ခဲ့ကြသည်။ ဦးဗာကုလ က မောင်ဇော်သောင်းကားဖြင့်၊ စာရေးသူက ဒေါ်မွှေးချိုကားဖြင့် လိုက်ပါ သွားကြသည်။ ဒေါ်မွှေးချိုက သူမ အိမ်ရှေ့တွင် ကားကို ခေတ္တရပ်နားပြီး အိမ်ထဲသို့ ၀င်၍ ဒေါ်လာယူသည်။ မိနစ်ဝက်ခန့်အကြာ လမ်းဘက် ပြန်ထွက်ခဲ့ပြီး မောင်ဇော် သောင်းတို့ ကားကို စောင့်သည်။ မောင်ဇော်သောင်းတို့ကား မကြာမီ ရောက်လာလျှင် ဆူးလေဘုရားဘက်သို့ ဆက်မောင်းကြသည်။ ဒေါ်မွှေးချိုက လမ်းကြုံသဖြင့် လမ်းဆုံနေရာအထိ စာရေးသူအား လိုက်ပို့ပေးသည်။ ထိုနေရာသို့ ရောက် လျှင် ဒေါ်မွှေးချိုနှင့် လမ်းခွဲပြီး မောင်ဇော်သောင်းကားသို့ ပြောင်းစီးသည်။ ထို့နောက် လေယာဉ်လက်မှတ် အရောင်းဌာနသို့ သွား၍ လေယာဉ်လက်မှတ်ဝယ်ကြသည်။ PG အဲယားလိုင်း ရန်ကုန်မှ ဘန်ကောက်၊ ဘန်ကောက်မှ ဘုံဘေ ဒေါ်လာ ၄၄၄ ပေးရ၏။ ဒီဖောင်ကို ၂၀၀၀ိ ပေးလုပ်ရ၏။ သန်ဘက်ခါ အောက်တိုဘာ ၁၃ -ရက်နေ့။ နံက် ၁၀း၅၅ မိနစ် ရန်ကုန်မှ စထွက်၊ ဘန်ကောက်သို့ ၁၂း၅၀ ရောက်မည်ဖြစ်၏။ ဘန်ကောက်မှ ည ၉း ၄၀ ထွက်၊ ဘုံဘေသို့ နောက်တစ်နေ့ နံနက် ၁၂း ၄၅ မိနစ်ရောက်မည်ဖြစ်၏။ လက်မှတ်အရောင်းစာရေးမက လေဆိပ်သို့ နံက် ၈ နာရီ အရောက်လာရန် ပြောသည်။ လေယာဉ်လက်မှတ်ဝယ်ပြီး နိုထရီ များပြုလုပ်သည့် ဘက်သို့ သွား၍ နိုထရီ လုပ်ငန်းများကို သွားရောက် မေးမြန်းကြသေး၏။ ထိုမှ အင်းစိန်ဘက် ကိုဇော်သောင်းအိမ်သို့ ထွက်ခဲ့ကြသည်။
ကိုဇော်သောင်းသည် စာရေးသူနှင့်တနယ်တည်းသား ဇာတိဖြစ်သည်။ ရန်ကုန်သူ မဘေဘီနှင့် အိမ်ထောင် ကျပြီးနောက် ရန်ကုန် အင်းစိန်မြို့တွင် အခြေချနေထိုင်သည်။ သား ၁၊ သမီး ၁ ထွန်းကားသည်။ အင်းစိန်ဈေးတွင် ရွှေပြည်ဟိန်းအမည်ဖြင့် ပရိက္ခရာဆိုင် ဖွင့်လှစ် ရောင်းချသည်။ သူ၏ အိမ်မှာ အင်းစိန် ရေလည်ဘုရားလမ်းတွင်ရှိသည်။ စာရေးသူနှင့် ဆရာတူတပည့်ဖြစ်၍ စာရေးသူအား ညီအစ်ကိုရင်းကဲ့သို့ ခင်မင်လေးစားသည်။ စာရေးသူ ရန်ကုန်ရောက်လာလျှင် သူ၏ ကားလေးဖြင့် စာရေးသူ သွားလိုရာကို မငြီးမညူ လိုက်ပါပို့ဆောင်ပေးသည်။ ကိုဇော်သောင်း၏ စာရေးသူ အပေါ် အချိန်ပေး ကူညီရိုင်းပင်းမှုကို အတူလိုက်ပါလာသူ ဦးဗာကုလကပင် အံ့သြယူရသည်။ ကိုဇော်သောင်းတို့ဇနီးမောင်နှံသည် ဘာသာရေးကိုလည်း လိုက်စားသူ များဖြစ်ရာ ယခုနှစ် ဗုဒ္ဓဂယာ ဘုရားဖူးသွားဘို့ စီစဉ်ထားကြောင်း သိရသည်။ ကိုဇော်သောင်းတို့ရပ်ကွက်တွင် နက်ဖြန် သီတင်းကျွတ်လပြည့်နေ့ သံဃ ဒါန ဆွမ်းလောင်းလှူရန် အတွက် ပြင်ဆင်ချက်ပြုတ်ပြင်ဆင်နေကြသည်ကို တွေ့ရသည်။ ထိုအတွက် ငွေ ၁၀၀၀၀ ကျပ် ပါဝင်လှူဒါန်းခဲ့သည်။ ညနေ မိုးချုပ်ချုပ်တွင် ကိုဇော်သောင်းတို့ အိမ်မှ သီတဂူ သို့ ပြန်လာခဲ့သည်။ နက်ဖြန် သီတင်းကျွတ်လပြည့်နေ့ သီတဂူဆရာတော်ကြီး အမေရိကန်နိုင်ငံမှ ပြန်လည်ကြွချီတော်မူလာမည်ဖြစ်ကြောင်း သိရသည်။
၁၂-၁၀-၁၁။ နံက် ၁၀ နာရီ သီတဂူဆရာတော် ပြည်ပခရီးစဉ်မှ ပြန်ကြွလာသည်။ ရွှေဥ ရွှေဆိုင်ပိုင်ရှင် ဒေါ်ရွှေဥ၏ မွေးနေ့အလှူ။ တက္ကသိုလ်ကျောင်းသား ရဟန်း တော်များအား နေ့ဆွမ်းဆက်ကပ်သည်။ စာရေးသူတို့သည် နေ့လည် ၂ နာရီ လောက်တွင် ကိုဇော်သောင်းကား ရောက်လာသည်နှင့် မြို့ထဲသို့ ထွက်ခဲ့သည်။ မေတ္တာဦး မျက်မှန်ဆိုင်တွင် မျက်မှန်လုပ်ရန်၊ အစ်မ၀မ်းကွဲတော်သူ ဒေါ်ထားကြည် အိမ်သို့သွားရန်နှင့် ရှော့ပင်သွားရန် ဖြစ်သည်။ ရှေးဦးစွာ မေတ္တာဦးသို့ သွားကြသည်။ မျက်မှန်ဆရာက စာရေးသူမျက်စိကို တိုင်းတာရာ အဝေး ၁၅၀။ အနီး ၂၅၀။ ကိုက် ကြောင်း ပြောသည်။ မျက်မှန်ကို နောက်ရက်မှ လာယူရန်ပြောသော်လည်း အချိန်မရှိကြောင်း ပြောပြသဖြင့် ညနေ ၆ နာရီ လာယူရန်ပြောသည်။ စာရေးသူသည် အိန္ဒိယမသွားမီးက အဝေး ၅၀။ အနီး ၁၅၀ ရှိရာ ယခု များစွာ ခုန်တက်သွားသဖြင့် မယုံနိုင်အောင် ဖြစ်မိသည်။ မျက်မှန်ဆိုင်မှ တာမွေဘက်သို့ ထွက်ခဲ့ကြသည်။ တာမွေ ဇဋိလလမ်းတွင် စာရေးသူ၏ အစ်မဖြစ်သူ ဒေါ်ထားကြည်တို့ မိသားစု နေထိုင်သည်။ ယနေ့ ညနေ ၄ နာရီ တွေ့ရန် ချိန်းထားသဖြင့် ထွက်လာခဲ့ခြင်းဖြစ်သည်။ အိမ်တွင် ဒေါ်ထားကြည် ၀က်လက်သို့ သွားနေ၍ မတွေ့ရ။ ဒေါ်ထားကြည်၏သမီး သုံးယောက်ကိုသာ တွေ့ရသည်။ စာရေးသူနှင့် ဦးဗာကုလအား ငွေ တစ်သိန်းကျပ်စီ လှူဒါန်းသည်။ ဒေါ်ထားကြည်မိသားစုသည် တာမွေ မင်္ဂလာဈေး ထဲတွင် အထည်ဆိုင် ဖွင့်လှစ် ရောင်းချသဖြင့် များစွာ စီးပွားဖြစ်ကြသည်။ ထိုအိမ်မှ အိန္ဒိယတွင် ၀တ်ဆင်ရန် ဆွတ်ကျယ်အကျီ အချို့ကို ၀ယ်ရန် ရှော့ပင် သွားကြသည်။ အိန္ဒိယတွင် ဆွတ်ကျယ် အနီ၊ အုတ်ခဲရောင် တို့ကို အတွင်း ကခံ၍ သင်္ကန်းကို အပေါ်က ၀တ်လေ့ရှိကြသည်။ ဂမုန်းပွင့်၊ အင်းဝတို့ကို သွားသည်။ အနီရောင် ဆွတ်ကျယ် လက်တို၂ လက်ရှည် ၁ အင်းဝမှ ၀ယ်ခဲ့သည်။ ဦးဗာကုလအတွက် အင်္ဂလိပ်စာအုပ် အချို့ဝယ်ပေးသည်။ ရှော့ပင်မှ တစ်ဖန် မေတ္တာဦးသို့ မျက်မှန်ပြန်ယူကြသည်။ မျက်မှန်ပြုလုပ်ခ စုစုပေါင်း ၈၀၀၀ ကျသည်။ ထိုမှ အင်းစိန်ဘက် ကိုဇော်သောင်း ဆိုင်နှင့် အိမ်။ ဆိုင်ဈေးမှာ အင်းစိန် ထောင်အနီးတွင် ရှိရာ ယနေ့ သီတင်းကျွတ် လပြည့် အကျဉ်းသမားများကို လွတ်ငြိမ်းခွင့် ပေးသည့်ရက်ဖြစ်သဖြင့် နံက်ပိုင်းက လမ်းများပိတ်ထားသည်ဟု သိရသည်။ ကိုဇော်သောင်းအိမ်မှ သီတဂူ။ သီတဂူ ရောက်တော့ ည ၇ နာရီကျော်ပြီဖြစ်။ သီတဂူဆရာတော် မြို့ထဲသို့ တရားဟောကြွ။
စာရေးသူသည် မြောက်ဒဂုံရှိ မမိုးခင်အိမ်သို့ ဒကာမကြီး ဒေါ်သောင်းခင်နှင့်တွေ့ရန် ဆိုက်ကားစီးသွားသည်။ ညနေပိုင်းတွင် လာခဲ့မည်ဟု ပြောထားရာ မြို့ထဲမှာ အချိန် ကုန်သွားသဖြင့် ယခုမှ သွားရောက်ခြင်းဖြစ်။ ဒကာမကြီး ဒေါ်သောင်းခင်သည် အလုံတွင် နေထိုင်သည်။ ယခု သမီးဖြစ်သူ၏ ခင်ပွန်း ဦးတင်အောင် ဆေးရုံတက် နေသဖြင့် သမီးဖြစ်သူအား စောက်ရှောက်ရန် မြောက်ဒဂုံရှိ သမီးဖြစ်သူ၏ နေအိမ်သို့ ခေတ္တ ရောက်နေခြင်းဖြစ်သည်။ ဒကာမကြီး ဒေါ်သောင်းခင်တွင် မမိုးခင်၊ မတိုးခင်၊ မစိုးခင်၊ မဖြိုးခင်ဟူ၍ သမီးလေးယောက် ရှိသည်။ တိုးခင်နှင့် ဖြိုးခင်သည် ဒူဘိုင်းတွင် အလုပ်လုပ်ကိုင်နေကြပြီး စိုးခင်သည် သီလရှင်(မ၀ူပသမာ) ဘ၀ဖြင့် စစ်ကိုင်း တောင်ရိုး သုဗောဓာရုံချောင်တွင် နေထိုင်သည်။ ဒေါ်သောင်းခင်ကို အိမ်တွင် အဆင် သင့် တွေ့ရသည်။ ပခုက္ကူမှ အလည်ရောက်နေသော ဒေါ်သောင်းခင်၏ ညီမ ဒေါ် သောင်းရှင်၊ အသက် ၉၀ အရွယ် ဒေါ်သောင်းခင်၏ အမေအိုတို့ကိုလည်း တွေ့ရ သည်။ ဒေါ်သောင်းခင်တို့ မိသားစုကို စစ်ကိုင်းတောင်တွင်နေသော (သမီးဖြစ်သူ) ဆရာလေး (မစိုးခင်) နှင့်စပ်၍ သိကျွမ်းခင်မင်ခဲ့သည်။ ရန်ကုန်ရောက် စာရေးသူ အတွက် ပင်တိုင် ဆွမ်းကွမ်း အလှူရှင်များဖြစ်ကြသည်။ ဒေါ်သောင်းခင်သည် စာရေးသူအား ဒေါ်လာ ငွေတစ်ရာနှင့် သမီးဖြစ်သူ ဆရာလေး၏ အလှူ ဒေါ်လာ ၇၉ ကျပ်ကိုလှူဒါန်းသည်။ လိုအပ်လျှင် ဒူဘိုင်းမှ သမီးများထံကိုလည်း အားမနာတမ်း တောင်းသုံးပါ ဟူ၍လည်း ဖိတ်ကြားလိုက်သေးသည်။ ( စကားချပ်။ ထိုအကြောင်းကို သိရလျှင် ဒူဘိုင်းမှ ညီမများ မျက်ခုံးလှုပ်နေပေလိမ့်မည်) ဒေါ်သောင်းခင်နှင့် တစ်နာ ရီခန့် စကားပြောပြီးလျှင် သီတဂူသို့ ပြန်ခဲ့သည်။ သမီးဖြစ်သူ မမိုးခင်ကိုမူ ဆေးရုံ တွင် ခင်ပွန်းလင်အား စောက်ရှောက်နေရသဖြင့် မတွေ့ခဲ့ရပေ။
0 comments:
Post a Comment