Monday, March 21, 2011

ကောင်းကင် ဘာ့ကြောင့် ကိုင်းရတယ်(၂)

ကမ္ဘာ့ပြဿနာများ


သတ်တဲ့ ပြဿနာ။ ဘာသာရေးအတွက်၊ နိုင်ငံရေး၊ လူမျိုးရေး၊ စီးပွားရေး အမျိုးမျိုးသော အရေးတွေကို အကြောင်းပြုပြီး သတ်ဖြတ်နေကြတယ်။ သတ်ဖြတ်ပြီးတော့ ပြဿနာကို ဖြေရှင်းကြတယ်။ ဘယ်ကလာ ငြိမ်းတော့မလဲ။ ပိုဆိုးတော့တာပေါ့။ သတ်တာ ကောင်းတဲ့ အလုပ်လို့တောင် ထင်မှတ်နေကြပြီ။ မသတ်ဘဲ မနေနိုင်ကြတော့ဘူး။ သတ်လွန်းလို့ အချို့ တိရစ္ဆန်တွေ မျိုးတုန်းတော့မယ်။ ဒါပေမယ့် ဗုဒ္ဓက မသတ်ဘို့ သတိပေးခဲ့တယ် မဟုတ်လား။

ခိုးတဲ့ ပြဿနာ။ ခိုးတဲ့ ပြဿနာက ပိုကျယ်ပြန့်တယ်။ ခါးပိုက်နှိုက်တာက အစ ကျူးကျော်စစ်ပြုတာအထိ ခိုးတဲ့အထဲ ထည့်လို့ ရတယ်။ ရုံးဝန်ထမ်း အချိန်မလေးစားတာ လည်း အပါအ၀င်ပေါ့။ ကမ္ဘာ့စစ်ပွဲတွေဟာ ခိုးတာက စတာလို့ ပြောလို့ရတယ်။ ကျမ်းဂန်မှာ ဆို ကံငါးပါးအစဟာ ခိုးခြင်းပဲလို့ ပြောထားတယ်။ ခိုးလို့ သတ်။ သတ်လို့ လိမ်။ ဘယ်လိုပဲဖြစ်နေနေ ခိုးတာဟာ ကမ္ဘာ့ငြိမ်းချမ်းရေးကို အကြီးအကျယ် ခြိမ်းခြောက်နေတဲ့ ပြဿနာတစ်ခုလို့ ပြောလို့ရတယ်။ ဒါကြောင့် ဗုဒ္ဓက မခိုးဘို့ မှာခဲ့တာပဲ။

ကာမဂုဏ်ပြဿနာ။ အရွယ်ရောက်လာရင် ကာမဂုဏ်ကို လိုက်စားတတ်ကြတာ ကမ္ဘာ့နိယာ မကြီးတစ်ခုပဲ။ မသင်ပဲ တတ်တဲ့ ပညာရပ်ထဲမှာ အဲဒါလည်း ပါတယ်။ တိရစ္ဆာန်တွေလည်း သိတယ်ဆိုတော့ ဒီပညာရပ်က အတော်လေး လွယ်လို့ နေမှာပေါ့။ ထားပါ တော့ ရှောင်လွဲခြင်း ငှာ မစွမ်းသာတဲ့ အမှုဆိုတော့ သူသူငါငါ လိုက်စားတတ်ကြတာ မဆန်း ဘူးပေါ့။ ဆန်းတာ ကတော့ တိရစ္ဆာန်တွေနဲ့ မခြား စည်းကမ်းကလနားမထားပဲ ပျော်ပါးကြတာ ဖြစ်တယ်။ အဲဒီတော့ အချင်းချင်း မုန်းပြီး မလိုအပ်တဲ့ အပြုအမူ အပြောအဆိုတွေနဲ့ ငြိမ်းချမ်းမှုတွေ ပျောက်သွားတော့တာပေါ့။ နောက်ဆက်တွဲ ပြဿနာက ဆေးမတိုးတော့တဲ့ ရောဂါတွေပေါ် ပေါက်လာခြင်းဖြစ်တယ်။ ဒါကြောင့် ဗုဒ္ဓက ပြောခဲ့တယ် စည်းကမ်းလေးနှင့် ပျော်ကြဘို့။

လိမ်ညာမှုပြဿနာ။ လိမ်ညာမှုတွေကတော့ တစ်မိုးလုံးဖျောက်ဆိပ်ဆိုတာလိုပဲ။ သတ်ဘို့လိမ်၊ ခိုးဘို့လိမ်။ ကာမအတွက် လိမ်စသည် နည်းမျိုးစုံပေါ့။ လိမ်ပါများတော့ အယုံအကြည်တွေ ကင်းမဲ့လာကြတယ်။ အခုဆို အချင်း ချင်း မယုံတော့ဘူး။ နိုင်ငံအချင်းချင်း မယုံတော့ဘူး။ သံသယမျက်လုံးတွေနဲ့ စခန်းသွားနေကြတော့တာပဲ။ ဘာဖြစ်လို့လဲ ဆိုတော့ ရှေ့တစ်မျိုး နောက်တစ်ဖုံ လိမ်တာတွေ များလို့ပေါ့။ လိမ်မှုရဲ့ နောက်ကွယ်မှာ မရိုးသားမှုတွေ ရှိတယ် ဆိုတာ လူတိုင်း သိကြတယ်။ ဒါကြောင့် ဗုဒ္ဓက ပြောထားတာ ရှိတယ်။ လူလိမ်တစ် ယောက် အတွက် မလုပ်ရဲတဲ့ မကောင်းမှုရယ်လို့ မရှိတော့ဘူးတဲ့။ ဘာပဲဖြစ်နေနေ တည်ငြိမ် အေးချမ်းမှုတွေကို ပျောက်ပျက်သွားစေတဲ့ သံသယတွေကို တိုးပွားစေတတ်တဲ့ လိမ်ညာမှု တွေကို လျော့သင့်တာကတော့ အမှန်ပဲ။

မူးရစ်ပြဿနာ။ မလိုလားအပ်တဲ့ ပြဿနာများရဲ့ နောက်ကွယ်မှာ မူးရစ်ဆေး(အရက်စသည်) အမြဲတမ်းပါ နေတတ်တာ တွေ့ရလိမ့်မယ်။ မူးရစ်ဆေးက စိတ်ကို ပုံမှန်မဟုတ်အောင် လုပ်တတ်တယ်။ စိတ်က ပုံမှန်မဟုတ်တော့ အမြင်တွေ ခံယူချက်တွေကလည်း ပုံမှန် မဟုတ် တော့ဘူး။ တကယ်တမ်း လူသားများစိတ်က ပုံမှန်တာများတယ်။ အမြင်တွေ ခံယူချက်တွေ တူတတ်တယ်။ အချင်းချင်း ကူညီဖေးမ မျှဝေတတ်တယ်။ အကောင်းအဆိုး ခွဲခြမ်းနိုင် စွမ်းရှိတယ်။ အဲဒီပုံမှန်စိတ်တွေကို မူးရစ်အကူအညီနဲ့ ဖျောက်ဖျက်ပြီး ပုံမှန်မဟုတ်တဲ့ လုပ်ငန်းတွေ လုပ်ကြတာတော့ အတော်လေး ဆိုးတယ်။ ဒါကြောင့်လည်း ဗုဒ္ဓက ပုံမှန်စိတ်လေးနဲ့ ပုံမှန်တဲ့ လုပ်ငန်းတွေကိုသာ လုပ်ကြဘို့ သတိပေးတဲ့အနေနဲ့ ရှောင်လေ ဝေးဝေး မူးရစ်ဆေးလို့ မိန့်ခဲ့တာပဲ။

ကမ္ဘာကို ပြောင်းလဲစေသော အရာများ

အိမ်ရှေ့ပူ အိမ်နောက် မချမ်းသာ ဆိုတဲ့အတိုင်း အပူအပင်တွေ များနေတဲ့ လောကကြီးမှာ သဘာဝတရားတွေပါ လိုက်ပါ ပူနေတာ ဆန်းတော့ မဆန်းဘူးပေါ့။ ဘာဖြစ်လို့လဲဆိုတော့ သက်ရှိတွေနဲ့ သက်မဲ့တွေက ဆက်စပ်နေလို့ဖြစ်တယ်။ ဒီအချက်ကို သိပ္ပံက မတွေ့ဘူး။ ဒါပေမယ့် ဗုဒ္ဓကတော့ အစောကတည်းက ပြောထားခဲ့တာပဲ။ လူတွေ ကိုယ်ကျင့်ပျက်တဲ့ အတွက် ရာသီဥတုတွေပြောင်းလဲသွားပုံ။ သီးနှံတွေ အရသာပေါ့ပျက်ပျက်ဖြစ်လာပုံတွေကို အသေးစိတ်ရှင်းပြခဲ့တာ အံ့စရာပဲ။ အဘိဓမ္မာမှာ ဆိုထားတာရှိတယ်။ ရုပ်တွေဟာ ကံ၊ စိတ်၊ ဥတု၊ အာဟာရတွေကြောင့် ဖြစ်ရတယ်ဆိုတာ။ ကံဆိုတာကတော့ သိတဲ့အတိုင်း အပြုအမူ အပြောအဆို အတွေးအခေါ်တွေပါဘဲ။ ပြုမူ ပြောဆို တွေးကြံမှုတွေက ကောင်းနေရင် ကမ္ဘာကြီးက ကောင်းနေမှာပဲ၊ ငြိမ်နေမှာပဲ။ မကောင်းရင်တော့ ဘီလူးဆိုင်းထွက်ကသလို ကသောင်းကနင်းတွေ ဖြစ်လာမယ်ပေါ့။ နောက်ပြီးတော့ စိတ်ဓာတ်တွေ ကောင်းမကောင်း ပေါ်မူတည်ပြီးတော့လည်း ကမ္ဘာက ပြောင်းလဲနေတာပဲ။ စိတ်ပူတွေကြောင့် ကမ္ဘာကြီးပူ လာတာ။ စိတ်အအေးတွေကြောင့် ကမ္ဘာကြီးအေးလာတာလို့ဆိုလိုတာပေါ့။ သတ်တာ၊ လုတာ၊ ကာမဖောက်ပြားတာ၊ လိမ်ညာတာ၊ မူးရစ်သုံးတာတွေများနေရင် ကံကောင်းဘို့ ခဲယဉ်းမယ်။ ကံမကောင်းရင် ကမ္ဘာကြီးကလည်း မကောင်းတော့ဘူးပေါ့။ လိုချင်ရမက်တွေ၊ မုန်းတီး စိတ်တွေ၊ မသိနားမလည်မူတွေ များနေရင် စိတ်အပူတွေနဲ့ ကမ္ဘာကို မီးတိုက်သလိုဖြစ် နေတာမို့ ကမ္ဘာကြီး မီးကျွမ်းလာမှာ မလွဲဘူးပေါ့။

ကမ္ဘာ့ငြိမ်ဆေး

မသတ်ဘူး။ မခိုးဘူး။ ကာမမဖောက်ပြားဘူး။ မလိမ်ဘူး။ မူးရစ်မသုံးဘူး ဆိုရင် ကံကောင်းခြင်း အတွက် လုံလောက်ပါပြီ။ အဲဒါတွေကို မလုပ်ဖြစ်ဘို့ စိတ်ဓာတ်တွေကိုလည်း ပြောင်းလဲပြစ် ရမယ်။ ဘာလို့လဲဆိုတော့ သတ်တယ် ညှစ်တယ်။ လုတယ် ယက်တယ် ဆိုတာ တွေက မကောင်းတဲ့ စိတ်ဓာတ်တွေကို အခြေခံလာတာမဟုတ်လား။ ဒီတော့ ဆိုးသွမ်းတဲ့ အပြုအမူ တွေ မဖြစ်ပေါ်ဘို့ ဆိုးသွမ်းတဲ့ စိတ်မိုက်စိတ်ရိုင်းတွေကို ထိန်းချုပ်ရမှာပေါ့။ အစားထိုး ပြောင်းလဲပစ်ရမှာပေါ့။ အချင်းချင်း ရက်စက်နေမဲ့အစား ချစ်ချစ် ခင်ခင်နေကြမယ်။ အပြန် အလှန် အကူအညီတွေပေး ဖေးဖေးမမ နေကြမယ်။ ၀မ်းသာကြည်နှုးမှု တွေရှိကြမယ်။ ကြင်နာ သနားစိတ်ထားကြမယ်။ အေးအေးချမ်းချမ်း လွတ်လွတ်လပ်လပ်နေကြမယ်။ ဘယ်လောက် များ ကောင်း ထားလဲ။ နေတတ်ရင် ကမ္ဘာကြီးက ပျော်စရာကြီးပါ။ အချုပ်က ချစ်ခင်ရမယ်။ ၀မ်းမြောက်ရမယ်။ သနားညှာတာ တတ်ရမယ်။ လျစ်လျူ ရှုနိုင်ရမယ်။ ဒါဆို ကမ္ဘာကြီး ငြိမ်းပြီပေါ့။ ငြိမ်းမှတော့ ငြိမ်ပြီပေါ့။ ကမ္ဘာကြီးကို ငြိမ်ဆေးတိုက်ဘို့ လက်မနှေးသင့်ဘူး။

အချုပ်

ကံ၊ စိတ်ဆိုတဲ့ သဘာဝတရားတွေနဲ့ကွန်ယက်သဘွယ် ဆက်စပ်နေတဲ့ ဒီလောကကြီးကို သဘာဝတရားတွေနဲ့ပဲ ပြန်လည်ထိန်းချုပ်ရမှာ ဖြစ်တယ်။ သဘာဝမဟုတ်တဲ့ ပြုင်ဖန်တီးမှု တွေနဲ့ စခန်းသွားလာတာ ကြာပြီးပဲ။ ဘာတစ်ခုများ ပြောင်းလဲတိုးတက်လာတာ ရှိလို့လား။ ပိုလို့သာ ဆိုးဆိုးလာခဲ့တယ် မဟုတ်လား။ အချုပ်ကို ဆိုရရင် ကမ္ဘာကြီး ပြန်လည် ကောင်းစား ဘို့ရာအတွက် အပြုအမူကောင်းတွေ လိုတယ်။ အပြုအမူကောင်းတွေ ဖြစ်ဘို့ စိတ်ထား ကောင်းတွေလိုအပ်တယ်။ စိတ်ထားကောင်းတွေဖြစ်ဘို့ နည်းမှန်လမ်းမှန်နဲ့ ကြိုးစား အားထုတ် ဘို့ လိုအပ်တယ်။

0 comments:

Post a Comment