Monday, August 30, 2010

ဗိယက်နာမ်ကျောင်းသား ကျောင်းသူများ၏ အမေများနေ့အခမ်းအနား






ူ


၂၄- ၈- ၂၀၁၀ နေ့ နံက်ပိုင်းတွင် ဗိယက်နမ်နိုင်ငံ ပညာ တော်သင် ရဟန်းတော်များ၊ သီလရှင်များ၊ လူပုဂ္ဂိုလ် ကျောင်းသား၊ ကျောင်းသူလေးများ စုပေါင်း၍ အမေများ နေ့အခမ်းအနားကို ပူနေးမြို့၊ ပူနေးတက္တသိုလ်၊ ဗုဒ္ဓ၀ိ ဟာရ ကျောင်းတော်တွင် ဆင်ယင်ကျင်းပခဲ့ကြသည်။ အခမ်းအနားကို နံက် ၁၀ နာရီတွင် စတင် ကျင်းပရာ ရှေးဦးစွာ ဗုဒ္ဓ၀ိဟာရ ကျောင်းဆောင် အတွင်းရှိ ဗုဒ္ဓဆင်း တုတော်ရှေ့တွင် ဗုဒ္ဓဂီတိများကို စုပေါင်း၍ ရွတ်ဖတ်ကြ သည်။ ထို့နောက် လှူဒါန်းဘွယ်ရာများကို လှူဒါန်းခြင်း၊ နေ့လည်စာများကို စုပေါင်းစား သောက်ခြင်းများကို ပြုလုပ်ကြသည်။ နေ့လည်စာ စားသောက်ပြီးနောက် လူငယ်များက အမေနေ့ ဆိုင်ရာ သီချင်းများကို အလှည့်ကျ သီကျူးကြသည်။




မြန်မာရဟန်းတော် အရှင်ကုသလသည် သူငယ်ချင်းဖြစ်သူ ( ဗိယက်နာမ် ရဟန်းတော်) က ဖိတ်ခေါ်သဖြင့် ဗိယက်နမ် ကျောင်းသား ကျောင်းသူများ ပြုလုပ်သည့် အမေနေ့ ပွဲသဘင်သို့ ပါဝင်တက်ရောက်ခဲ့သည်။ နေ့ လည်စာ စားပြီးချိန် ၀မ်းသာစကား ပြောပေးပါ ဟု တောင်းဆိုကြသဖြင့် ကျေးဇူးတင်စကား ၀မ်းမြောက်စကား ပြောဆိုပေးရသည်။

ယနေ့သည် ဗိယက်နာမ်နိုင်ငံ၏ အမေနေ့ဖြစ်သကဲ့သို့ မြန်မာနိုင်ငံ၏ မေတ္တာအခါတော်နေ့လည်းဖြစ် ပါကြောင်း။ (မြန်မာနိုင်ငံ၏ လပြည့်နေ့သည် ၂၅ ရက်နေ့ဖြစ်သည်) ထို့ကြောင့် အမေနေ့နှင့် မေတ္တာနေ့၊ မေတ္တာနေ့ နှင့် အမေနေ့၊ မြန်မာနှင့် ဗိယက်နာမ်၊ ဗိယက်နာမ်နှင့် မြန်မာ နီးစပ်သော အနေအထားတွင် ရှိပါကြောင်း။ အမေဆိုသည်မှာ နေရာတိုင်း၊ အချိန်တိုင်းတွင် ရှိပါကြောင်း။ အမေဆိုသော စကားသည် မည်သည့် ဘာသာ စကားတွင်ဖြစ်စေ မပြောင်းလဲသော အနေအထားတွင် ရှိပါကြောင်း။ ပါဠိဘာသာအားဖြင့် အမေသည် မာတာ။ အဖေသည် ပိတာ။ အင်္ဂလိပ်စကားတွင်လည်း မာသား၊ ဖားသား။ အိန္ဒိယ၊ တရုပ်၊ ကိုရီးယားတွင် မာမာ၊ ပါပါ။ မြန်မာများက မေမေ၊ ဖေဖေ ဟု ခေါ်ကြပါကြောင်း။ ထို့ကြောင့် အမေဟူသည် ကမ္ဘာလောကကြီးအတွင်း၌တူမျှသောသဘောရှိပါကြောင်း။

အမေဟူသည် မေတ္တာ၊ ကရုဏာ၊ မုဒိတာ ၊ ဥပေက္ခာဆိုသည့် ကောင်းမြတ်သောစိတ်များကို ပိုင်ဆိုင် ထားသူများဖြစ်ပါကြောင်း။ ၄င်းစိတ်ဓာတ်များသည် ကမ္ဘာလောကကြီး သာယာလှပဘို့ အေးချမ်းဘို့ အတွက် အဓိက အခြေခံတရားများဖြစ်ပါကြောင်း။ ထို့ကြောင့် နိုင်ငံ၊ လူမျိုး၊ ကမ္ဘာလောက အေးချမ်းသာယာ ဘို့ရန် အတွက် လူတိုင်းလူတိုင်း အမေ့၏ စိတ်ဓာတ်များကို မွေးမြူသင့်ပါကြောင်း။ ယနေ့ ပြုလုပ်သည့် အမေများနေ့ အခမ်းအနားသည် အမေ့၏ စိတ်ဓာတ်များကို အားလုံး မွေးမြူကြဘို့ လိုအပ်ကြောင်း သတိတရား များဖြစ်စေသည့်အတွက် အလွန်အကျိုးများသည့် အခမ်းအနားတစ်ခုဖြစ်ပါကြောင်း။ အခမ်းအနားသို့ ယခုလို တက်ရောက်ခွင့် ရသည့်အတွက် အလွန်တရာ ကျေးဇူးတင်ပါကြောင်း။ အားလုံးသော ဗိယက်နာမ် ရဟန်းတော်၊ သီလရှင်၊ ကျောင်းသား ကျောင်းသူများ ကိုယ်စိတ်နှစ်ဖြာ ဘေးရန်ကွာ ချမ်းသာကြပါစေလို့ မေတ္တာဆုမွန်များ ချွေအပ်ပါကြောင်း ပြောဆိုပြီး ၀မ်းမြောက်စကားကို အဆုံးသတ်လိုက်သည်။

ထို့နောက် ဆင်းရဲ နွမ်းပါးသူများကို စားစရာ( ဆီ၊ ဆန်၊ ဆား) များဝေငှပေးကမ်းခြင်း အစီအစဉ်ကို ပြုလုပ်ကြပြီး အမေများနေ့ အခမ်းအနားကို ညနေ ၃ နာရီတွင် အဆုံးသတ်လိုက်သည်။

0 comments:

Post a Comment